好多僱主大吐苦水，指工人向財務公司借錢，最後因為還唔到錢而一走了之，留低僱主面對一大堆追數信，滋擾電話，甚至上門追數恐嚇，嚴重影響生活同擔驚受怕。其實好多僱主都有一樣經歷，就係工人走佬前，都曾經借錢俾對方，究竟僱主應唔應該借錢俾工人？

安樂窩唔建議僱主借錢俾工人，據以往經驗，當僱主借錢俾外工人後，有部分工人會還錢，但大部分都會選擇走佬，或者收到錢後性情大變而搏炒，所以好心未必有好報。有僱主因為同工人相處一段日子，覺得對方幫到屋企，選擇借錢俾對方，有幾點一定要注意：

1. 借錢前一定要工人寫借據，僱主要保障自己。

2. 僱主要同工人傾還錢期數同每期金額，但根據勞工法例，工人還款金額唔可以多過人工四分之一。

3. 決定借錢之前，僱主要有心理準備工人唔還錢走佬。

大部分工人借錢原因都係鄉下屋企人生病，屋企因為天災要維修，好多僱主怕假如自己唔借錢，工人就會搵財務公司。財務公司睇準時機，用唔同方法聯絡工人，例如扮外賣員，送速遞等。僱主應該多留意屋企有冇寄俾外傭的信件，或者直接唔俾外傭收信。

假如發現工人借財仔，僱主應該點做？

1. 要保持冷靜，直接打俾財務公司，問清楚工人借幾多同還款期，然後同工人商討還錢方法。

2. 假如覺得唔可以再留工人，僱主應立即填寫終止僱傭合約通知書(ID 407E)俾入境事務處，證明工人已經離職或斷約。財務公司收到入境處通知後就唔可以再向僱主追債，否則會被吊銷牌照處。不過，僱主要留意一件事，假如借錢後有定期還錢，就唔可以因為呢個原因而炒工人，除非工人因冇還錢而令僱主被追債，俾財務公司騷擾，先可以唔使俾賠償通知金炒對方。